Si u shitën të dhënat e qindra mijëra shqiptarëve për 20-30 mijë lekë

Dosja hetimore që Euronews Albania disponon tregon se specialistja e IT-së në Drejtorinë e Tatimeve, Eni Qirjako i ka dërguar specialistit të IT-së (kolegut të saj), Andi Agarajt të dhënat që lidhen me pagat e shqiptarëve përmes e-mail-it. Transferimi i të dhënave është bërë në intervale të ndryshme kohore, nga tetori i vitit 2020 deri…

Dosja hetimore që Euronews Albania disponon tregon se specialistja e IT-së në Drejtorinë e Tatimeve, Eni Qirjako i ka dërguar specialistit të IT-së (kolegut të saj), Andi Agarajt të dhënat që lidhen me pagat e shqiptarëve përmes e-mail-it.

Transferimi i të dhënave është bërë në intervale të ndryshme kohore, nga tetori i vitit 2020 deri në shtator të vitit 2021. Qirjako është bërë pjesë e Tatimeve prej 20 korrikut 2020, ndërsa Agaraj që prej vitit 2013.

Në dosje thuhet se pas nxjerrjes së të dhënave vetë specialistja e IT-së Eni Qirjako është vënë në dijeni të shpërndarjes së pagave më 22 dhjetor të vitit 2021, dhe ka konstatuar se data dhe ora e krijimit të file-ve përkon me të dhënat që i ka dërguar kolegut të saj, Andi Agarajt.

Për këtë ajo ka lajmëruar menjëherë drejtorin e saj Ervin Muçën ku i ka bërë të qartë se user-i i krijuar me emrin “Moza Seraj” është useri që ajo përdor në aksesimin e të dhënave nga ana e saj.

Gjithashtu nga veprimet hetimore, rezulton se të dhënat e administruara nga Klodian Sota dhe Endri Ikonomi, dy personat e punësuar në subjekte private që kanë blerë të dhënat, i kanë marrë këto kundrejt shumave nga 20 mijë deri në 30 mijë lekë përmes hardiskeve të jashtme të cilat janë vënë në dispozicion nga Andi Agaraj.