Prokuroria turke ka lëshuar një urdhër arresti për të paktën 103 pjesëtarë të Forcave të Armatosura Turke (TSK) për shkak të lidhjeve me organizatën terroriste FETO, përgjegjëse për përpjekjen e dështuar të grusht shtetit ushtarak në Turqi në korrik 2016, raporton Anadolu Agency (AA).
Departamenti për terrorizëm dhe krim të organizuar i Prokurorisë së Stambollit vazhdon hetimet dhe operacionet për arrestimin e presonave të lidhur me FETO-n, kurse kësaj radhe bëhet fjalë për pjesëtarë të ushtrisë turke.
Në bazë të dëshmive se përmes telefonit në mënyrë të koduar kanë komunikuar me njerëz brenda FETO-s, është lëshuar një urdhër për arrestimin e të paktën 103 pjesëtarëve të ushtrisë, përfshirë 2 kolonelë, 2 togerë, 6 majorë, 14 kapitenë, 21 nëntogerë dhe oficerë të tjerë.
Në të paktën 32 qytete turke kanë nisur tashmë operacionet e njëkohshme të arrestimit ndërsa nga 103 ushtarë turq, 74 janë arrestuar.
