Presidenti rus Vladimir Putin mirëpriti homologun e tij turk, Recep Tayyip Erdogan, të mërkurën në Kremlin, për të diskutuar mbi bisedimet për Sirinë. Turqit kishin njoftuar më herët se bisedimet do të fokusoheshin mbi të ashtuquajturën “zonë sigurie” nga Ankaraja zyrtare, në Sirinë veriore.
Rusia dhe Turqia kanë rënë dakord për të koordinuar operacionet në terren, në Siri, pas njoftimit befasues të presidentit amerikan, Donald Trump, gjatë muajit të kaluar për tërheqjen e rreth 2.000 trupave amerikanë nga Siria.
Në nisje të takimit të tyre në Kremlin, Putin iu referua Erdoganit me fjalët “i dashur mik”, teksa tha se vendet e tyre “punojnë bashkërisht për çështje të sigurisë rajonale, e po ashtu bashkëveprojnë aktivisht në Siri”.
Erdogani përdori të njëjtën shprehje vlerësuese për Putinin, siç vërehet në komentet e përkthyera nga shtypi rus, e tha se “solidariteti ynë është një kontribut me peshë në sigurinë e rajonit”.
Retorika e ngrohtë erdhi pavarësisht faktit se dy udhëheqësit në fjalë mbështesin palë të kundërta në konfliktin e Sirisë. Rusia ofron mbështetje të qenësishme ndaj qeverisë siriane, ndërsa Turqia ka mbështetur grupet rebele që luftuan forcat besnike të presidentit Bashar al-Assad.
E pavarësisht gjithçkaje, ata kanë punuar bashkërisht për të gjetur një zgjidhje politike ndaj konfliktit 7-vjeçar. Turqia mirëpriti tërheqjen e planifikuar të Uashingtonit nga Siria, por e ardhmja e milicive kurde të mbështetura nga SHBA, të konsideruar si terroristë nga Ankaraja, ka tensionuar disi marrëdhëniet mes dy aleatëve të NATO-s.
Erdogan tha të hënën se do të diskutonte me Putinin krijimin e “zonës së sigurisë” të kontrolluar nga Turqia në Sirinë veriore, siç kishte sugjeruar presidenti Trump. Kurdët, aleatët më të efektshëm të Amerikës në luftën kundër militantëve të Shtetit Islamik, të cilët kontrollojnë njëherazi pjesën më të madhe të veriut të Sirisë, e kanë refuzuar këtë ide, me frikën e një ofensive turke në territorin e kontrolluar prej tyre.
Moska, mbështetëse prej kohësh e Assadit, pritet ta kundërshtojë planin, me ministrin e Jashtëm rus, Sergei Lavrob, që tha javën e kaluar se Damasku duhet të marrë kontrollin e veriut të vendit.
Javën e kaluar gazeta e shquar ruse “Kommersant” publikoi një artikull të shkruar nga presidenti Erdoğan, ku fliste për bashkëpunimin turko-rus sidomos kur bëhet fjalë për zgjidhjen e krizës siriane dhe luftën kundër terrorizmit.
- Në vitin 2018 biseduan 25 herë
Sipas të dhënave të AA-së, në vitin 2018 Erdoğan dhe Putin 25 herë kanë biseduar për temat aktuale, në mesin e të cilave edhe për situatën në Siri. Që prej atëherë, shtatë herë janë takuar kokë më kokë, ndërsa 18 herë kanë biseduar me telefon.
Të dy liderët kanë pasur rastin të bisedojnë edhe gjatë ceremonisë së shënimit të 100 vjetorit të përfundit të Luftës së Parë Botërore të organizuar në Paris.
Në vitin 2018, Erdoğan dhe Putin gjashtë herë u takuan në samite. Për herë të parë në samitin trilateral më 4 prill të vitit 2018 në Ankara, më pas më 7 shtator në samitin trilateral në Teheran, më 26 korrik në samitin Brazil-Rusi-Indi-Kinë-Afrika e Jugut (BRICS) në Johannesburg, më 17 shtator në samitin në Soçi, më 27 tetor në samitin Turqi-Rusi-Francë-Gjermani në Stamboll dhe më 1 dhjetor në samitin e liderëve të G20-tës në Argjentinë.
- Blerja e sistemit mbrojtës S-400
Të dy liderët në vitin 2018 biseduan për energjetikën, ndërsa më 3 prill vendosën themelet e centralit bërthamor Akkuy në Mersin, që është projekti i parë turk i këtij lloji. Erdoğan dhe Putin në ceremoni morën pjesë përmes video-konferencës.
Vitin e kaluar është realizuar përparim i konsiderueshëm lidhur me blerjen e sistemit mbrojtës S-400, që është një nga llojet më të rëndësishme të bashkëpunimit të Turqisë dhe Rusisë gjatë kohëve të fundit.
Vendimi i Turqisë për të blerë dy sisteme të mbrojtjes S-400 nga Rusia me vlerë 2.5 miliardë dollarë, rezultoi me nënshkrimin e marrëveshjes më 29 dhjetor të vitit 2017.
Kjo çoi në një kundërshtim të fortë nga SHBA-të duke kërkuar të heqin dorë nga blerja.
Më 3 prill të vitit 2018, gjatë vizitës së presidentit rus në Turqi, ai tha se në takimin me presidentin turk është marrë vendim për shkurtimin e afatit për dërgesën e sistemit S-400.
Takimi i dy presidentëve do të vazhdojë edhe pas takimit të sotëm në Moskë. Në periudhën e ardhshme do të mbahet një takim i ri trepalësh Turqi-Rusi-Iran, në të cilin do të marrin pjesë presidentët e dy vendeve.
Përveç kësaj, kryediplomati turk, Mevlüt Çavuşoğlu dhe homologu i tij rus, Sergey Lavrov, dje folën në telefon, por detajet e bisedës nuk u shpalosën.
