Zyrtarja e Departamentit Amerikan të Shtetit Kathleen Ann Kavalec u nominua për ambasadore në Shqipëri në vendin e Donald Lu, por nuk u konfirmua. Mediat amerikane kanë shkruar disa artikuj për prapaskenat e këtij vendimi.
Gazetarja amerikane Sarah Carter duke folur për “Fox News” dje, tha se Donald Trump e ka tërhequr përfundimisht nominimin e zyrtares së lartë, që pritej të konfirmohej si ambasadore në Shqipëri. Sarah Carter thotë se ka zbuluar edhe shkakun e një vendimi të tillë.
” Kathleen Ann Kavalec ka komunikuar me ish-agjentin britanik, Christopher Steele, i cili kishte hartuar një dosje me pretendime shkeljesh e komploti ndërmjet fushatës presidenciale të Trumpit dhe Moskës në zgjedhjet e vitit 2016. Kavalec u takua personalisht dhe ka pasur komunikim të vazhdueshëm me Steele, para dhe pas zgjedhjeve presidenciale” shprehet gazetarja amerikane, raporton Shqiptarja.
Përveç takimit me Christopher Steele që pretendohet, një tjetër arsye që ka penalizuar Ann Kavalec duket se ka qenë edhe fakti se ka punuar për zëvendëssekretaren e Shtetit, Victoria Nuland dhe gjithashtu është mbështetëse e ish-presidentit Barack Obama dhe ish-kandidates Hillary Clinton, ndërsa ka bërë edhe një donacion të vogël prej 250 dollarësh.
Por, pavarësisht deklaratave të gazetares amerikane dhe informacioneve që pretendon se ka zbuluar, Departamenti i Shtetit në faqen zyrtare vijon që ta tregojë Kathleen Ann Kavalec si kandidate për ambasadore në Shqipëri. Deri në emërimin e ri, Leyla Moses-Ones është e ngarkuara me punë e SHBA-së në Shqipëri.
