Punonjësit e stacionit të pompimit të Poçemit vijojnë grevën e urisë. 14 punonjës janë në ditën e 7-të grevës, ku edhe ndodhen në gjendje të rënduar nga mosngrënia. Ata shprehen të vendosur të qëndrojnë në grevë urie, madje sipas tyre, deri në vdekje nëse nuk marrin rrogat.
“Do të qëndrojmë këtu deri në vdekje nëse nuk marrim lekët”, shprehet një punonjës.
Ndërsa mjekja thotë se gjendja shëndetësore e tyre është rënduar nga mosngrënia.
Ndërkohë edhe naftëtarët e Ballshit janë sot në ditën e tretë të grevës së urisë.Kjo grevë urie ka sjellë edhe reagime nga ana e opozitës dhe e Avokatit të Popullit. Dy përfaqësues të Avokatit të Popullit vizituan dje grevistët e Poçemit dhe ata të Ballshit, ku dëgjuan ankesat e tyre, të cilët kërkojnë marrjen e pagave të prapambetura. Tek ata ka shkuar edhe ish-deputeti i PD-së, Luan Baçi dhe ka deklaruar se pushtetarët i kanë lënë në mëshirë të fatit dhe se askush nuk pyet për ta. Ndërsa, kryetarja e LSI-së, Monika Kryemadhi u bëri thirrje strukturave të LSI-së në Fier që t’u qëndrojnë pranë punëtorëve.
Rafineria e Ballshit e administruar nga kompania “Tosk Energji” është mbyllur që në muajin shtator. Naftëtarët dolën disa herë në protestë në Fier, ku kërkuan që të merrnin pagat e tyre, por u dëgjuan nga autoritetet. Janë më shumë se 800 punëtorë që kanë mbetur pa punë. Bankers në një reagim pas mbylljes së rafinerisë, e ka hedhur fajin tek ‘Tosk Energji’, ku u shpreh se kjo kompani ka shkelur disa herë kontratat çka e ka vënë atë në pozitë të vështirë për sasinë e naftës gjendje e cila ka kaluar më pas për eksport.
