Vonesat në kontrollin e pasaportave, në Aeroportin “Heathrow” të Londrës, i ka lënë pasagjerët në pritje deri në dy orë e gjysmë gjatë muajit të kaluar.
Me përjashtim të vetëm një dite gjatë muajit korrik, kontrollet kufitare nuk arritën t’i përmbaheshin objektivit për një procesim prej 45 minutash apo më pak, në 95% të vizitorëve që vinin nga jashtë Zonës Ekonomike Europiane (EEA).
Kompania “Virgin Atlantic”, e cila hartoi këto të dhëna, thotë se pasagjerët janë ndierë të irrituar për shkak të vonesave të panevojshme dhe të pajustifikueshme.
Qeveria britanike, ndërkohë, ka njoftuar dërgimin e një stafi shtesë prej 200 vetësh në “Heathrow” gjatë muajve të verës.
Sipas statistikave, pritja më e gjatë e emigrantëve për kontrollin e pasaportave u regjistrua më 6 korrik, kur udhëtarëve nga jashtë EEA-së, një zonë e përbërë nga 31 shtete europiane, u është dashur të presin në radhë deri në dy orë e 36 minuta./topchannel
