Në një konferencë për mediat të enjten pasdite Agjencia Evropiane e Barnave komunikoi se vaksina e prodhuar nga AstraZeneca dhe Universiteti i Oksfordit është e sigurt dhe efikase për të luftuar Covid-19.
Drejtuesja e agjencisë, Emer Cooke tha se komiteti ka vendosur se “kjo është një vaksinë e sigurt dhe efektive” dhe përfitimet tejkalojnë çdo rrezik të mundshëm. Dhe se doza, sipas saj, nuk shoqërohet me rritje të rrezikut të përgjithshëm të eventeve tromboembolike ose mpiksjes së gjakut.
Cooke deklaroi po ashtu se EMA po kërkon të bëjë studime vëzhguese për të hetuar më tej. Ajo u bëri thirrje personave që pësojnë ndonjë efekt anësor ta raportojnë. Por, gjithsesi drejtuesja e EMA theksoi se vaksina e prodhuar nga AstraZeneca është një opsion i sigurt dhe efektiv për të mbrojtur qytetarët kundër Covid-19. Sipas rregullatorit evropian, vaksina në fjalë, demonstroi një efikasitet të paktën 60% në parandalimin e sëmundjes së koronavirusit.
Kujtojmë se një numër vendesh të Bashkimit Evropian duke përfshirë Gjermaninë, Italinë dhe Francën kanë zgjedhur të pezullojnë procesin e vaksinimit për shkak të raportimeve për raste fatale të shkaktuara nga mpiksje të gjakut, deri në një vendim të dytë. Frika ndaj vaksinës së prodhuar nga AstraZeneca është ndjerë edhe në vendin tonë pasi dhjetëra mësues nuk pranuan që ta merrnin dozën.
