Me praninë e presidentit të Turqisë, Recep Tayyip Erdoğan dhe pjesëmarrje të mysafirëve nga katër anët e botës, sot ka filluar inaugurimi i Aeroportit të Ri të Stambollit, i cili, pas përfundimit të plotë, do të jetë aeroporti më i madh në botë, raporton Anadolu Agency (AA).
Presidenti Erdoğan, në fjalimin e inaguarimit të aeroportit, bëri të ditur se emri i aeroportit të ri do të jetë “Aeroporti i Stambollit”. Ai bëri të ditur se të gjitha fazat parashihet të pëfundojnë deri më 2028, ndërkohë rrjedhimisht, aeroporti do të vazhdojë të rritet përgjatë 10 viteve të ardhshme.
“Faza e parë ka kapacitet për 90 milionë pasagjerë në vit. Kjo do të rritet në 150, nëse nevojitet në 200 milionë, pas përfundimit të fazave”, deklaroi Erdoğan.
Erdoğan tha se Stambolli nuk është vetëm qyteti më i madh i Turqisë, por edhe marka më e vlefshme e vendit.
Duke iu referuar Aeroportit Ataturk, Erdoğan tha se Aeroporti Ataturk do të ruajë statusin e tij si aeroport, por do të mbyllet për fluturime komerciale.
Erdoğan tha se aeroporti i ri, me arkitekturën, administrimin dhe financimin e tij është nderi i vendit dhe projekt që në botë do të merret si shembull.
“Aeroportin e Stambollit e shohim si një shërbim të madh që kemi bërë jo vetëm për vendin tonë, por për gjithë rajonin dhe botën”, u shpreh ai.
Preisdenti turk u bëri thirrje të gjithë “miqve” në rajon dhe botë që së bashku të ndërtojnë një të ardhme në paqe, të sigurt dhe të begatë për të gjithë.
“Turqia është e vendosur që të bëhet një ndër dhjetë ekonomitë më të mëdha të botës, si dhe simboli i paqes, qetësisë, sigurisë, prosperitetit në rajon dhe në botë”, deklaroi presidenti Erdoğan.
