Ndër vite Kombëtarja shqiptare është përballur me kundërshtarë të ndryshëm, nga ato më të dobëtat, deri të ato elitaret, që i kanë dhënë tonin futbollit botëror, por vështirë të gjesh në histori, një “makth” si ky që kuqezinjtë përjetuan mbrëmjen e sotme në “Loro Boriçi, ku u mposhtën me rezultatin e thellë 0-4 nga Skocia.
Mërgim Mavraj duhej të ishte lideri që do të udhëhiqte Kombëtaren kuqezi drejt suksesit, por “katranosi” gjithçka pasi la skuadrën me 10 futbollistë pas vetëm 23 minutash lojë, moment ky që i hapi udhë një “nate të zezë” të futbollit shqiptar.
Që nuk do të ishte mbrëmja e kapitenit u pa që në minutën e dytë, kur Mavraj gaboi pozicionim dhe më pas rrëshqiti, duke humbur kundërshtarin, që u nis rrezikshëm drejt portës së Berishës.
Në minutën e 14’ ishte Xhaka që e teproi me tentativën për driblim, duke humbur topin pak metra larg zonës, ndërsa Fraser nuk fali, duke lëvizur bukur, lënë në vend Gjimshitin dhe çuar topin në rrjetën e Berishës.
Pa u mbushur 10 minuta nga goli i pësuar Shqipëria mbeti me 10 lojtarë., Mërgim Mavraj u nënshkrua në mënyrë të çuditshme nga kryesori me të kuq, duke “tradhtuar” skuadrën, pasi ishin dhe shumë minuta për t’u luajtur.
Panucci tenton të reagojë, për të mbajtur skuadrën në lojë dhe vendos të largojë Ergys Kaçen, për të hedhur në fushë një mbrojtës, që në rastin konkret ishte Ardian Ismajli, debutues me fanellën kuqezi.
Veprim shumë skandaloz nga ana e Mavrajt. Në fundin e pjesës së parë kishte vend dhe për një 11-metërsh për miqtë, të cilët dyfishuan. Në pjesën e dytë u duk sikur të besuarit e Panuçit prisnin me zor që të mbyllje ndeshja, pasi inkursionet e Uzunit dhe Grezdës, nuk krijonin as situata të rrezikshme.
Protestat e kuqezinjve nuk vlejnë, ndërsa penalltinë e ekzekuton me mjeshtëri Steven Fletcher, që dërgon topin për herë të dytë në rrjetën e portës së Berishës, duke kompletuar një 45-minutësh të tmerrshëm për Kombëtaren Shqiptare.
Në fillim të pjesës së dytë, kuqezinjtë tentojnë të reagojnë, duke organizuar disa manovra sulmuese, por pas vetëm 7 minutash, “tradhtohen” edhe nga Berat Gjimshiti, që lë fushën e lojës i dëmtuar dhe zëvendësohet nga Kastriot Dermaku, edhe ky debutues.
Para portës së Berishës luajnë dy lojtarë debutues, që për më tepër nuk njihen aspak lojën e njëri-tjetrit dhe kjo shfrytëzohet maksimalisht nga skocezët, që çajnë vazhdimisht në qendër dhe arrijnë të shënojnë edhe dy gola të tjerë, duke çuar rezultatin në 0-4.
Të zhgënjyer maksimalisht nga ajo që po shihnin në fushën e lojës, tifozët e shumtë që kishin mbushur shkallët e stadiumit “Loro Boriçi”, kërkuan largimin e trajnerit Panucci dhe këtë e bënë në gjuhën e tij, duke thirrur në kor “Panucci Vaffanculo”.
Nga ana tjetër, trajneri italian i kuqezinjve zgjodhi të ndjekë në heshtje 30 minutat e fundit të takimit me Skocinë, që mund të kenë qenë edhe të fundit e drejtimit të Kombëtares Shqiptare prej tij.
Skocia merr maksimumin nga transferta në “Loro Boriçi” dhe tashmë në kuotën e 6 pikëve, do të diskutojë vendin e parë në grup pas 3 ditësh, kur do të presë në Glasgow skuadrën e Izraelit.
Ca për shkak të dëmtimeve, por edhe të tjera për zgjedhje personale, trajneri Panucci dështoi totalisht edhe me zëvendësimet e realizuara, duke bërë që edhe në pjesën e dytë përfaqësuesja e Shqipërisë të torturohet edhe më shumë në fushë.
Nga ana tjetër, Shqipëria mbyll në mënyrën më të keqe të mundshme, një kompeticion të cilin “e nderoi” vetëm në start, për të gabuar gjithçka në 3 takimet pasardhëse dhe tashmë në vendin e fundit në grup, rrezikon rënien në Ligën D.
E vetmja notë pozitive, nëse mund të cilësohet e tillë, është ajo e debutimit të Ardian Ismajlit dhe Kastriot Dermakut me fanellën kuqezi, me dy qendërmbrojtësit që nuk mund ta kishin imagjinuar kurrsesi një natë të tillë.
Liga e Kombeve, e shtunë, 20:45
Stadiumi “Loro Boriçi”, Liga C
Shqipëri 0-4 Skoci
Shënues: Frejzër 14′, Fleçër 45+2′, Forrest 53′, 67′
Shqipëri: Berisha, Veseli, Gjimshiti (Dermaku 53′), Grezda, Memushaj, Manaj (Balaj 62′), Xhaka, Mavraj, Binaku, Kaçe (Isamjli28′), Uzuni. Trajner: Kristian Panuçi. Të gatshëm: Strakosha, Kastrati, Lila, Kaja, Ademi, Vrioni, Lilaj, Ndoj, Gavazaj.
Skocia: A. MekGregor, Paterson, Robertson, Bejts, Mekkena, K. MekGregor, Forrest, Amstrong, S. Fleçër, Kristi, Frejzër. Trajner: A. MekLeish.
Kartonë të verdhë: Manaj 13′, Mavraj 22′
Karton të kuq: Mavraj 23′
https://streamable.com/ar4e7
