Ekonomia rajonale do të bjerë në recesion në vitin 2020, si pasojë e frenimit të shkaktuar nga pandemia e koronavirusit. Paralajmërimi vjen nga Banka Botërore ne një raport te posaçëm.
Cyril Muller, Zëvendëspresident i këtij organizmi për Evropën dhe Azinë Qendrore, thotë se duhet vepruar me shpejtësi për ti fuqizuar sistemet e shëndetësisë dhe të mbrojtjes sociale, për ta mbështetur sektorin privat dhe për ta ruajtur stabilitetin financiar .
Sipas raportit Shqipëria pritet të humbasë 1,4 për qind të Prodhimit të Brendshëm Bruto.
“Covid ka goditur prodhimin, tregtinë, turizmin dhe shërbimet e tjerë jo të tregtueshme. Rindërtimi dhe rimëkëmbja e prodhimit të energjisë elektrike do të kompensojnë pjesërisht rënien në aktivitetet të tjera. Turizmi dhe transporti, të dy këta sektorë do të marrin goditje të fortë nga pandemia, pasi numri i furnizimit të punës do të bie ndjeshëm nga masat e marra nga qeveria për distancim social”.
Nëse pandemia arrin të kontrollohet në tremujorin e dytë, ekonomia pritet të ketë një kthesë pozitive në tremujorin e fundit të vitit. Ne raport thuhet gjithashtu se borxhi publik pritet të rritet mbi 70% të PBB në vitin 2020, si dhe deficiti do të rritet në 3,9 për qind të PBB. Shkak për ketë janë te ardhurat e pakta për shkak të pandemisë dhe mbështetja financiare e dhënë për rindërtimin pas tërmetit të 26 nëntorit të vitit të shkuar.
Ekspertet nderkombëtare kane përllogaritur se varfëria pritet të rritet me 0.4 për qind. Nëse COVID-19 zgjat deri në tremujorin e dytë të 2020 ose kthehet në 2021, efektet negative mbi kërkesën pritet të jenë shumë më të mëdha dhe të vazhdojnë. Likuiditeti i konsiderueshëm në sektorin bankar vendas mund të lehtësojë rreziqet e menjëhershme të financimit, ku pjesën më të madhe e financimit të brendshëm e kapin investimet e sektorit privat. Kërkesa e dobët globale e reflektuar në çmime më të ulëta të mallrave dhe një rënie e vazhdueshme e çmimeve të naftës gjithashtu do të godasë industrinë nxjerrëse të vendit, me pasoja të rëndësishme fiskale dhe ekonomike.
Grupi i Bankës Botërore premton se është duke marrë masa për t’i ndihmuar vendet në zhvillim duke dhëne deri në 160 miliardë $ gjatë 15 muajve në vijim.
Një dite me pare edhe Drejtori i Përgjithshëm i Organizatës Botërore të Tregtisë paralajmëroi se pandemia e koronavirusit mund të shkaktojë recesionin më të thellë të përjetuar ndonjëherë. Në një video-konferencë në Gjenevë të Zvicrës, drejtori Roberto Azevedo, tha se bota duhet të synojë shfrytëzimin sa më shumë të mundshëm të të gjithë nxitësve ekonomike të zhvillimin e qëndrueshëm për zmbrapsjen e situatës”. Prej pandemisë përllogaritet qe tregtia botërore të bjerë në mënyrë dramatike gjatë vitit 2020, nga 13-32 për qind.