Në Kishin Shën Stefan në Stamboll është organizuar një koncert i quajtur “Muzikë dhome”, të ardhurat e të cilit do të dhurohen për fëmijët që janë prekur nga tërmeti në Shqipëri, transmeton Anadolu Agency (AA).
Shoqata e Fëmijëve Kreativë njoftoi se aktiviteti është organizuar në bashkëpunim të Kryekonsullatës Bullgare në Stamboll dhe Vakëfit të Kishës Ortodokse të Ekzarkatit Bullgar.
Koncerti i cili fillimisht ka qenë i paraparë të organizohet në Shqipëri, por është anuluar për shkak të tërmetit, me kërkesë të virtuozit të violinës Cihat Aşkın është organizuar një koncert bamirësie për fëmijët e prekur nga tërmeti.
Në koncert kanë performuar në violinë Dilara Yıldırım dhe Fikret Diril, ndërsa në violonçelë Beliz Güney.
Pjesëmarrës të këtij koncerti kanë qenë Mbretëresha e Nigerisë, Zaynab Otiti Obanor, kryekonsulli bullgar në Stamboll, Angel Angelov, Sekretari i Parë në Kryekonsullatën bullgare në Stamboll, Nikolay Dimitrov, kryetari i Bordit të Kishave Ortodokse Bullgare, Kiryako Liaze, kryetarja e Komitetit Ekzekutiv të Shoqatës së Fëmijëve Kreativë, Demet Sabancı Çetindoğan, kryetarja e Bordit të Shoqatës së Fëmijëve Kreativë, Didem Çapa dhe Ebru Sanver.
Kujtojmë se tërmeti i fuqishëm që goditi Shqipërinë më 26 nëntor, përveçse shkaktoi 51 persona të vdekur dhe qindra të plagosur, shkaktoi edhe dëme të konsiderueshme materiale. Si pasojë e tërmetit janë shkatërruar dhe dëmtuar pallate, shtëpi, monumente kulturore, shkolla e objekte të institucioneve. Vendi u godit në ditët e fundit edhe nga disa tërmete të tjera.