Italia do të rihapë kufijtë nga data 3 Qershor, ndërkohë që përpiqet të lehtësojë mëtej masat e karantinës dhe të nxisë ekonominë e tretë më të madhe të Eurozonës.
Qeveria italiane publikoi këtë fundjavë një dekret që do të lejojë udhëtimet brenda dhe jashtë vendit si dhe të heqë barrierat në lëvizjet e brendshme, në përpjekje për t’i dhënë nxitje industrisë së turizmit gjatë Verës.
Kryeministri Italian, Giuseppe Conte, shtoi se heqja e barrierave në udhëtime do t’i aplikohet vetëm vizitorëve nga vendet e tjera të Bashkimit Europian.
Mbi 31,000 persona kanë vdekur si pasojë e Covid-19 në Itali, që është shifra e tretë më e madhe pas Shteteve të Bashkuara dhe Britanisë.
Megjithatë, numri i vdekjeve dhe rasteve të reja kanë rënë, ndërkohë që vetëm 262 vdekje janë raportuar në 24 orët e fundit.
Roma zyrtare është gjendur përballë presioneve nga bizneset për të rinisur aktivitetin ekonomik sa më shpejtë të jetë e mundur. Heqja e barrierave në udhëtim vjen pasi qeveria italiane deklaroi se dyqanet dhe restorantet mund të lejohen të rihapen me masa të distancimit social nga data 18 Maj.
Në fillim të muajit Mars, Italia u bë vendi i parë në Europë që vendosi karantinën kombëtare. Ekonomia italiane projektohet të pësojë një rënie me 9.1% këtë vit, sipas projeksioneve të Fondit Monetar Ndërkombëtar. Produkti i Brendshëm Bruto u tkurr me 4.7% në tremujorin e parë, nga fundi i 2019-s.
Nga data 18 Maj do të hiqen kufizimet për njerëzit që lëvizin në rajonet e italisë si dhe do të lejohet rihapja e kishave. Conte i’u dorëzua presionit nga rajonet italiane për të rihapur baret dhe restorantet më 18 Maj, nga fillimi i Qershorit që projektohej më parë.
Megjithatë, mbledhjet në hapësira publike do të ndalohen, pavarësisht heqjes së barrierave të udhëtimit. Qeveria italiane do të mbajë aftësinë për të rivendosur masat e karantinës nëse rritet ndjeshëm numri i të infektuarve.
