46 shtetas të Maqedonisë së Veriut, shumica shqiptarë humbën jetën në një aksident tragjik të ndodhur në perëndim të Bullgarisë, në autostradën Struma.
Kryeministri i Maqedonisë së Veriut, Zoran Zaev i cili ka shkuar menjëherë në Bullgari pas ngjarjes së rëndë tha për mediat vendase të gjitha viktimat e aksidentit janë të rinj me moshë nga 25-30 vjeç, mes të cilëve edhe fëmijë.
Kreu i qeverisë së RMV tha se ka besim te autoritetet bullgare dhe se nuk do të kërkojë hetim paralel.
“Ne u besojmë kolegëve tanë bullgarë. Nëse ata kanë nevojë për ndihmë, ne jemi të gatshëm t’i ndihmojmë në hetim. Tani gjëja më e rëndësishme është të shohim se si t’i ndihmojmë viktimat”, shtoi Zaev.
Mesazhe ngushëllimi pas ngjarjes së rëndë kanë ardhur nga krerët e politikës shqiptare si kryeministri Edi Rama, presidenti Ilir Meta apo ministrja e Jashtme, Olta Xhaçka.
Nga 52 persona që udhëtonin në autobus, 46 kanë ndërruar jetë. Ne mesin e viktimave janë edhe dy shtetas të huaj, një nga Belgjika dhe një nga Serbia.
Mësohet se autobusi është përplasur në barrikadat e autostradës e më pas është përfshire nga flaket. Nuk dihen shkaqet, por përjashtohet përgjumja e shoferit sepse vetëm 10-15 minuta me herët autobusi është nisur nga një karburant.