Presidenti i SHBA-ve, Donald Trump, vazhdon të mbrojë princin e kurorës së Arabisë Saudite, Mohammed bin Salman, përkundër provave në rritje se ai është përgjegjës për vrasjen e gazetarit Jamal Khashoggi, tha gazeta New York Times, transmeton Anadolu Agency (AA).
Në një opinion të botuar, The Times ka shkruar se Trump e quajti Arabinë Saudite një “aleat vërtet spektakolar”, krahasuar drejtpërdrejt me kritikat e tij të mëparshme ndaj mbretërisë për “mbulimin më të keq në histori”.
Edhe pasi CIA lëshoi një raport i cili arriti në përfundimin se Mohammed bin Salman kishte urdhëruar vrasjen, Trump tha se do të priste që administrata e tij të dorëzonte raportin e vet para se të bënte ndonjë koment dhe të akuzonte.
“Për Trump, mjafton që princi Mohammed mohoi çdo përfshirje në vrasjen në telefonatat me të”, ka shkruar The Times.
Gazeta vuri në dukje se pozicioni i Trumpit rreth Khashoggit po bëhet gjithnjë e më i izoluar, ndërsa Bashkimi Evropian (BE) kërkon përgjigje të qarta mbi atë që ka ndodhur me gazetarin saudit, kurse madje edhe Izraeli, i cili ka raporte strategjike me Arabinë Saudite, nuk e ka mbrojtur verbalisht princin e kurorës.
Khashoggi, kolumnist për gazetën The Washington Post, u zhduk pasi hyri në Konsullatën Saudite në Stamboll më 2 tetor.
Edhe pse fillimisht tha se Khashoggi ishte larguar i gjallë nga konsullata, qeveria saudite disa javë më vonë pranoi se ai ishte vrarë atje.
Pozicioni i Trumpit në këtë çështje gjithashtu është përballur me rezistencë në legjislaturën e SHBA-ve.
“Çdo gjë tregon se princi i kurorës së Arabisë Saudite, MbS, ka urdhëruar vrasjen e gazetarit të Washington Post, Jamal Khashoggi”, ka thënë Bob Corker, kreu i Komitetit të Senatit për Marrëdhëniet me Jashtë.
Presidenti Trump ka vënë në dukje se zotimi i Arabisë Saudite për të blerë armë me vlerë 110 miliardë dollarë ka krijuar vende pune për popullin amerikan. Megjithatë, The Times, duke cituar analistë të mbrojtjes, tha se janë rezervuar vetëm rreth 14,5 miliardë dollarë në shitje.
Trump gjithashtu ka thënë se SHBA ka pezulluar furnizimin ajror me karburantë për avionët sauditë në luftën e Jemenit dhe ka sanksionuar 17 shtetas sauditë të përfshirë në këtë krim.
“Në të njëjtën kohë, ne kemi një aleat dhe dua të qëndroj me një aleat që në shumë mënyra ka qenë shumë i mirë”, ka thënë Trump.
The Times ka shkruar se pavarësisht mbrojtjes që Trump ka shprehur për princin Mohammed bin Salman, Shtëpia e Bardhë do të përdorë rastin Khashoggi për të zbutur luftën në Jemen, gjë që do të qetësonte ligjvënësit amerikanë që kanë bërë thirrje për t’i dhënë fund kësaj lufte.
Megjithatë, angazhimi i Trumpit për Mohammed bin Salman nuk do të lëkundet pasi princi saudit “është bërë thelbi i strategjisë së administratës në Lindjen e Mesme”, ka shkruar The Times.
“Është shumë e qartë se ajo që administrata dëshiron është të heqë qafe Kongresin në lidhje me Jemenin”, tha për New York Times Bruce Riedel, ekspert për Arabinë Saudite dhe bashkëpunëtor i lartë në Institutin Brookings.
“Por kjo nuk e zgjidh problemin themelor, që është se Mohammed bin Salman është një forcë destabilizuese në rajon”, ka shtuar ai.
