Qendra Spitalore Universitare “Nënë Tereza” ka bërë një reagim zyrtar lidhur me pacientin që u hodh sot nga spitali Infektiv por që fatmirësisht nuk ka ndërruar jetë. Në reagimin e tyre zyrtar shkruhet se stafi mjekësor po bën përpjekjet maksimale për t’i shpëtuar jetën pacientit, ndërkohë sigurojnë të gjithë qytetarët se askush nuk do të mbetet pa marrë shërbim mjekësor.
REAGIMI I PLOTË:
Qendra Spitalore Universitare “Nënë Tereza” sqaron opinionin publik se stafi mjekësor në Spitalin Infektiv po bën përpjekjet maksimale për të shpëtuar jetën e pacientit, pas ngjarjes së rëndë të ndodhur në spitalin Infektiv, ku një pacient tentoi të kryente aktin tragjik. Pacienti me inicialet R.G., 69 vjeç aktualisht është nën kujdesin e mjekëve të këtij spitali. Në këto ditë të vështira të përballjes me Covid-19, kur mjekët tanë po bëjnë një sakrificë të jashtëzakonshme, sigurojmë qytetarët se jemi në krye të detyrës dhe askush nuk do të mbetet pa marrë shërbim mjeksor! Në këto momente nevojitet bashkëpunim dhe drejtësi në përcjelljen e informacioneve, për të ndihmuar mbi të gjitha stafet mjekësore që janë 24 orë në shërbim, siç kanë bërë dhe do të bëjnë deri në fund të kësaj beteje!
Fillimisht u raportua se pacienti ndërroi jetë pas hedhjes nga lartësia, por më pas u sqarua se 69-vjeçari fatmirësisht kishte arritur që të mbijetonte dhe se aktualisht ndodhet nën kujdesin e mjekëve.
