KQZ ka nisur hetimin administrativ për deputetin e PS në Fier, Bujar Çela edhe për kreun e Kadastrës Lushnje, Arben Qalliu. KQZ bën të ditur se ka marrë dy kallëzime për dy personat në fjalë ndaj ka nisur hetimi ndaj tyre pasi në kundërshtim me kufizimet e vendosura nga KQZ, kanë shpërndarë leje legalizimi. Në fakt ishte anëtari i Komisionit Rregullator në KQZ, Muharrem Çakaj i cili denoncoi gjatë mbledhjes së KQZ më 30 dhjetor 2020 shkeljen e Aktit Normativ për veprimtaritë e ndaluara para zgjedhjeve, nga deputeti socialist Bujar Çela.
Kjo shpërndarje e çertifikatave është publikuar dhe në llogarinë e Bujar Çelës në Facebook pikërisht atë ditë.
Çela dhe Qalliu janë thirrur në seanca dëgjimore nga KQZ në 11 janar. Do të jetë Qalliu ai i cili do të thërritet për të dhënë shpjegime pranë Komisionit Qendror të Zgjedhjeve për shkeljen e vendimit nr.9, që ndalon përdorimin e administratës publike në fushatë elektorale.
NJOFTIMI I KQZ:
“Në Komisionin Qendror të Zgjedhjeve, janë raportuar dy denoncime në ndërfaqen e “Aktiviteteve të Ndaluara”, në rubrikën “Kallëzo”, për veprimtaritë e deputetit të PS, Qarku Fier, z. Bujar Çela, i cili ka publikuar në llogarinë e tij personale në Facebook disa foto me qytetarë të ndryshëm duke shpërndarë leje legalizimi të shtëpive të tyre në Njësinë Administrative Hyzgjokaj.Bazuar në denoncimet e raportuara, Komisioneri Shtetëror i Zgjedhjeve, ditën e hënë, më datë 11.01.2021, ora 12:00, zhvillon seancën dëgjimore për shkelje të parashikuara në vendimin nr. 9, datë 24.12.2020 të Komisionit Qendror të Zgjedhjeve, meZ. Arben Qalliu, Drejtor i Drejtorisë Vendore i A.SH.K Lushnjë.Bazuar në nenin 47 dhe 87 të ligjit nr. 44/2015 “Kodi i Procedurave Administrative”, z. Qalliu ka të drejtën të paraqitet vetë ose me mbrojtës ligjor për të dhënë shpjegimet e tij, ditën e hënë, më datë 11.01.2021, në adresë Rr.Ibrahim Rugova, nr.4, Tiranë”, njofton KQZ.
KQZ ka kufizuar qeverinë që 4 muaj përpara zgjedhjeve të mos organizojnë apo të marrin pjesë në aktivitete ku priten shirita elektoralë apo prezantohen projekte të investimeve në fushën e transporteve, energjisë, mjedisit, shëndetësisë, kulturës dhe arsim. Lista e personave që e kanë të ndaluar përfshirjen në aktivitetet e mësipërme janë: kryeministrin, Zëvendëskryeministri, ministrat dhe zëvendësministrat, kryetarët dhe nënkryetarët e bashkive, drejtorët e përgjithshëm të agjencive, apo shoqërive si: OSHEE, Ujësjellës, Posta, etj.
