Deti merr “bekimin” e qeverive, “topi” në dorën e Metës! Presidenti: Duhet të vendosë Kushtetuesja

Aktualisht Gjykata Kushtetuese ka 4 anëtarë, ndërsa funksionimi i saj do duhet të nisë pas plotësimit të kuorumit prej 6 anëtarësh.

Çështja e detit në kufirin Shqipëri-Greqi ka marrë “bekimin” e dy qeverive për të shkuar në Gjykatën Ndërkombëtare të Hagës, por tashmë “topi” është në dorën e presidentit Ilir Meta. Do duhet që presidenti të japë miratimin dhe më pas palët të nënshkruajnë një marrëveshje që do t’i dërgohet gjykatës Ndërkombëtare.

Në studion e ABC News,profesori i të Drejtës Ndërkombëtare Ksenofon Krisafi theksoi se palët në përballjen përpara drejtësisë së huaj do diskutojnë vetëm për zonën ekonomike ekskluzive, pasi kufijtë detarë janë të përcaktuar që prej vitit 1913.  Por pas deklaratës së përbashkët mes kreut të qeverisë shqiptare Edi Rama dhe ministrit të Jashtëm grek Nikos Dendias, mbetet që presidenti të shprehet mbi qëndrimin që do mbajë në lidhje me këtë çështje.

Në njoftimin e shpërndarë nga zyra e presidencës pas takimit të kreut të shtetit me kryediplomatin grek, Meta nuk e përmendi marrëveshjen e arritur mes palëve sot, ndërsa u shpreh se do të inkurajojë që ajo të trajtohet përmes dialogut dhe respektit, duke synuar një zgjidhje të përhershme dhe të qëndrueshme. Meta tha se marrëveshja për këtë çështje duhet të jetë në përputhje me Konventën e Kombeve të Bashkuara dhe me vendimin e Gjykatës Kushtetuese të Shqipërisë.

“Marrëveshja për këtë çështje të rëndësishme duhet të jetë në përputhje me Konventën e Kombeve të Bashkuara mbi Ligjin e Detit, me legjislacionin e të dy vendeve dhe Vendimin e Gjykatës Kushtetuese të Republikës së Shqipërisë”, tha presidenti Meta.

Gjykata Kushtetuese nuk është ngritur ende. Aktualisht Gjykata Kushtetuese ka 4 anëtarë, ndërsa funksionimi i saj do duhet të nisë pas plotësimit të kuorumit prej 6 anëtarësh. Ambasadorja amerikane Yuri Kim ka kërkuar nga palët të bashkëpunojnë që Kushtetuesja të bëhet funksionale para Janarit të vitit 2021, gjë për të cilën janë zotuar disa nga përfaqësuesit e mazhorancës./abcnews.al

Lajme të ngjashme