Pentagoni konfirmon transferimin e 3 mijë ushtarëve në Evropën Lindore

Presidenti amerikan Joe Biden do të dërgojë mijëra trupa në Evropën Lindore këtë javë në vazhdën e tensioneve Rusi-Ukrainë, konfirmoi Departamenti i Mbrojtjes (Pentagoni), raporton Anadolu Agency (AA). Zëdhënësi i Pentagonit John Kirby tha në një konferencë shtypi se SHBA-ja qëndron krah për krah me aleatët e saj të NATO-s dhe situata pranë kufirit të…

Presidenti amerikan Joe Biden do të dërgojë mijëra trupa në Evropën Lindore këtë javë në vazhdën e tensioneve Rusi-Ukrainë, konfirmoi Departamenti i Mbrojtjes (Pentagoni), raporton Anadolu Agency (AA).

Zëdhënësi i Pentagonit John Kirby tha në një konferencë shtypi se SHBA-ja qëndron krah për krah me aleatët e saj të NATO-s dhe situata pranë kufirit të Ukrainës kërkon që Washington-i të përforcojë “qëndrimin parandalues ​​dhe mbrojtës” në krahun lindor të NATO-s.

Ai tha se 1.000 ushtarë, aktualisht me bazë në Gjermani, do të ripozicionohen në Rumani në ditët në vijim për t’iu shtuar 900 forcave të SHBA-së që janë tashmë atje.

“Kjo forcë është krijuar për të penguar agresionin dhe për të përmirësuar aftësitë tona mbrojtëse në shtetet aleate të vijës së parë”, tha Kirby.

Përafërsisht 2.000 trupa do të lëvizin nga shteti amerikan i Karolinës së Veriut në Poloni dhe Gjermani.

“Dua të jem shumë i qartë për diçka. Këto nuk janë lëvizje të përhershme. Ato janë lëvizje të ndërmarra për t’iu përgjigjur mjedisit aktual të sigurisë”, deklaroi Kirby.

Para Pentagonit, shtypi amerikan citoi disa burime të afërta me çështjen të kenë thënë se presidenti i SHBA-së Joe Biden ka miratuar dërgimin e ushtarëve në vendet anëtare të NATO-s në Evropën Lindore.

Biden më 28 janar tha se së shpejti do të dërgonte trupa në vendet e NATO-s në Evropën Lindore.

Në një deklaratë më 24 janar, zëdhënësi i Pentagonit Kirby theksoi se 8.500 ushtarë janë në gatishmëri për të ofruar mbështetje në rast se Forca e Reagimit e NATO-s aktivizohet kundër situatave të papritura në krizën në Ukrainë.

Shtetet e Bashkuara dhe aleatët perëndimorë akuzojnë Rusinë se po përgatitet për një invazion në Ukrainë pasi thuhet se Moska ka grumbulluar më shumë se 120.000 trupa në kufirin e saj me ish-republikën sovjetike, së bashku me një dislokim masiv të tankeve dhe artilerisë.

Një grumbullim i ngjashëm është parë në Bjellorusi, në veri të Ukrainës.

Në të dyja rastet, Rusia mohon se po përgatit invazion dhe thotë se forcat e saj janë atje për stërvitje të rregullta.